Democracial Real Xa!
Redacción . Baixo o lema 'Non ao Pacto do Euro: Europa para o pobo e non para os mercados', Democracia real Xa! convoca mobilizacións para o 19 de xuño na maioría das cidades do estado e apoia, secundando coa súa asistencia e colaborando activamente na súa difusión ás organizadas por outros movementos para esas mesmas datas.
A convocatoria, que atinxe as cidades e varias vilas de Galiza, está promovida en rede, "unidas contra o abuso que a clase política consente".
Para os organizadores, de Democracia Real Xa!, as razóns para a concentración do 19 de xuño "seguen sendo as mesmas que sacaron á rúa miles de persoas o 15 de Maio en máis de 60 cidades; aínda que esta vez, se cabe, estamos aínda máis indignados, ante a ameaza que supoñen para o noso benestar social os novos recortes de salarios, pensións, I+D+i, sanidade e educación; a eliminación dos servizos sociais, o maior atraso na idade de xubilación, a ampliación dos impostos e inxustos reaxustes dos salarios á produtividade e á competitividade previstos na aplicación do Pacto do Euro, que consideramos o maior atentado socioeconómico e internacional contra os dereitos sociais".
Seguindo coa xustificación da protesta, o Pacto do Euro "implicará maiores sacrificios para todos a causa das medidas de austeridade que se queren impoñer e polo tanto rexeitámolo. Esiximos a reorientación das políticas públicas cara á protección do interese xeral. Esiximos que a dación do ben inmóbelen pago da hipoteca sexa recoñecida. Esiximos unha verdadeira repartición da riqueza e o traballo, como única saída ao desemprego. Esiximos unha vida digna para todas as persoas, onde os dereitos sexan para todas e desaparezan os privilexios da clase política, a fraude fiscal e os paraísos fiscais. Esiximos, así mesmo, cambios na Lei Electoral que ofrezan vías para unha auténtica participación das persoas nas decisións públicas".
Neste caso, e logo do acoso de determinados medios contra o Movemento 15M tras os incidentes de Catalunya o 15 de xuño, os organizadores advirten da intolerancia completa cos actos de violencia e o seu compromiso coa protesta pacífica.
Comentários